සංවාදයක් විනාශ කරන නූගතුන්ගේ විසංවාද ක්‍රමය..

මෙය දැන් සමාජයේ විවරණය යුතු කරුණක්ම සේ සැලකිය යුත්තක් බවට පත් වී තිබේ.

යමෙක් යම් කාරණයක් පිළිබඳව ප්‍රස්තුතයක් ගොඩ නගන විට එයට එල්ල විය හැකි ප්‍රධාන අභියෝග දෙකක් දක්නට ලැබේ.

ඒ ගොඩනැගූ ප්‍රස්තුතයට එරෙහිව ප්‍රචණ්ඩත්වයක් ගොඩ නැගීම හෝ එයට එකඟ නො වන පිරිසක් බිහි වීම ය.

මේ දෙකින් ප්‍රචණ්ඩත්වය වඩාත් භයානක ය. ඊට වඩා එකඟ නො වන පිරිසක් බිහි වීම සැනසිල්ලට කාරණයක් බව කිව යුතු ම ය.

නමුත් එලෙස එකඟ නොවීමට විසංවාදයක් ගොඩ නගන විට එහි නූගත් ප්‍රාථමික මිනිසෙකු ගේ පටන් ප්‍රබුද්ධ මිනිසෙකු ගේ එරෙහී වීමක් දක්වාම එම එකඟ නොවීමේ ක්‍රියාවලිය තුළ මිනිසුන් වර්ගීකරණය කළ හැකි ය.

එම වර්ගීකරණය දැක්වීමට Hierarchy (haɪə.rɑː.ki) යන වචනය භාවිත කරයි.

එම වචනයේ අර්ථය ලෙස Cambridge ශබ්දකෝෂය

A system in which people or things are put at various levels or ranks according to their importance වශයෙන් 'පුද්ගලයන් හෝ දේවල් ඔවුන් ගේ වැදගත්කම අනුව විවිධ මට්ටම්වලට හෝ ශ්‍රේණිවලට තබා ඇති පද්ධතියක්' ලෙස අර්ථ ගන්වා තිබේ.

මේ මිනිසුන් ඔවුන් ගේ විසංවාදය ගොඩ නඟන ආකාරයට ඔවුන්ව වර්ග කිරීම⁣ට Paul Graham නැමැත්තා සාධනීය ක්‍රමවේදයක් ඉදිරිපත් කොට තිබේ.

එය Graham’s Hierarchy of Disagreement යන නමින් හැඳින් වේ.

එයට අනුව එම වර්ගීකරණයට

01. නූගතා ගේ විසංවාද ක්‍රමය

02. මධ්‍යම නුවණැත්තෙක් ගේ විසවාංද ක්‍රමය

03. ප්‍රබුද්ධයා ගේ විසංවාද ක්‍රමය

වශයෙන් ප්‍රධාන ක්‍රම තුනක් ඇතුළත් වේ.

අද ප්‍රස්තුත ඉදිරිපත් කිරීම එදාට වඩා දියුණු අවස්ථාවක පවතී. සමාජ මාධ්‍ය ජාලාවන් සමාජයට විවර වීමත් සමඟ Facebook, Youtube, Twitter වැනි සමාජ මාධ්‍යයන් හරහා මේ ප්‍රස්තුත බොහෝමයක් දක්නට ලැබේ.