පූසාගේ නැට්ටෙ ගැට ගහපු මීයා..

මේ කථාවක් නොව ශාසණයක මා වැනි භික්ෂුවක් විසින් කිව යුත්තක්ම ය..

භාග්‍යවතුන් වහන්සේ විසින් දේශිත අපූරු උපමාවක් ඇත..

මහණෙනි, යම් සේ කිකිළියක් විසින් රකින බිත්තරයක් වෙත් ද, ඇය ඒ මත මනාව සයනය නො කළහොත්, උණුසුම් කළ යුතු තැන දි උණුසුම් නො කළහොත් , ගඳ ගැස්වීමට ඇවැසි කළ ගඳ නො ගැස්වූවොත් එවිට කිසිසේත් ඒ කිකිළියට ‘මාගේ කුකුළු පැටව් නියපොතු අගින් හෝ මුව තුඩින් හෝ බිත්තර කටුව පළාගෙන සුවසේ පිටවන්නාහු නම් ඉතා මැනව’යි මෙබඳු කැමැත්තක් නූපදින්නේය.

ඉදින් එසේ සිතුණ ද ඒ කුකුළු පැටව් පා අගින් හෝ මුව තුඩින් හෝ බිත්තර කටුව පළාගෙන සුවසේ පිටවන්නට නුසුදුස්සෝම වෙති. ඊට හේතුව කුමක් ද යත්,

යම් සේ කිකිළියක් විසින් රකින බිත්තරයක් වෙත් ද, ඇය ඒ මත මනාව සයනය කළ යුතු බැවිනි. උණුසුම් කළ යුතු තැන දි උණුසුම් කළ යුතු බැවිනි. ගඳ ගැස්වීමට ඇවැසි කළ ගඳ ගැස්විය යුතු බැවිනි.. එසේ නොකළ විට පැටවුන්ට සුවසේ නික්මෙන්නට සුදුසු පරිසරය නොමැති බැවිනි..

මා මේ කථාව කියන්නෙ අපගේ ථෙරවාදය ගරු කරන මහා සඟ රුවනට ය..

මේ ධර්මය දේශණා කළ යුතු තැනදි දේශනා කළ යුතු ය.. පටිභාහනය කළ යුතු කරුණු එන විට ප⁣ටිභාහනය කළ යුතු ය.. ප්‍රශ්ණ ආ විටක විසඳිය යුතු ය.. ඒවා සිල්වතුන් සිල්වතුන් හෝ සංඝයා ඇතර ඇතිවන වාද නොව, දුසිල්වතුන්ගෙන් ශාසණය බේරා ගැනීමට කරන ධර්ම සාකච්ඡා ය..

එසේ නැතිව රැකෙන ශාසණයක් නැති බැවිනි..

ඒවා සාකච්ඡා කරන්නට නැති ධර්ම විනය ඥාණය "පූසාගේ නැට්ටේ බැඳි මීයන් වැනි බව" අපට කියා දී තිබේ.. ඒ මීයාගෙන් පූසාට ඵලක් නැති බැවිනි..

අර ආචාර්ය මේ ආචාර්ය ස්ථානාධිපති කම් අපට වැඩක් නැත.. ශාසණය වෙනුවෙන් ධර්මයේ පිහිටා කථා කරන සඟරුවනක් ලොවට ඇවැසි කාලය මෙය ය..

ජාතිය වෙනුවෙන් හඬ නගන යතිවරු මිථ්‍යාව දැක පසුබාන අයුරු ජුගුත්සාජනක ය.. අවශ්‍ය පළමුව ජාතිය බේරා ගැනීම⁣ ද ශාසණය බේරා ගැනීම ද ?

දෙමළාට වූව ද බෞද්ධ විය හැකි ය.. එයට තිබිය යුත්තේ සිංහල කම නොව බෞද්ධ කම ය..

එනිසා රට නෙවෙයි පළමුව, ශාසණය රකින්නට වෙර දරන සේක්වා..

බේසම කොච්චර හිල් වැහුවත් පලක් නැත. එහි ඇති වතුර පල් වේ නම්.. එය වැසිකිළියකට වත් යොදා ගත නොහැක. එනිසා හැමෝම බේසම දිහාම නොබලා වතුර දිහාත් බලනු මැනව..

එය එසේත් බැරිනම්, අවස්ථාවෙන් ප්‍රයෝජන ගෙන "මහණෙනි මා ලෝකයා සමග විවාද නොකරමි"යි අපට බණ නොකිය යුතු ය..

සම්පූර්ණයෙන්ම පුප්ඵ සූත්‍රය බැලි ය යුතු ය..

එහි වාද නොකරන බව ඇතත්, සත්‍යය සත්‍ය හැටියටත්, අසත්‍ය අසත්‍ය හැටියටත් කිව යුතු බව පරියායෙන් කියා ඇත..

බ්‍රහ්මජාල සූත්‍ර වල මේවා පැහැදිලිව කියා ඇත.. කෑල්ලක් අල්ලන් මෙවැනි වෙලාවකදී ද Positive Marketing කිරීමට යෑම මෙවැනි මිත්‍යාමතවාදීන්ට " වල් ඌරන් කැකුණ තලන විට හබන් කුකුළන්ට රජමගුල්" යැයි කීවා වනු ඇත.. එක්කො මේවාට කථා කළ යුතු ය.. නැතිනම් නිහඬව සිටිය යුතු ය..

මට සමාවෙන්න.. මට කා සමග වත් පුද්ගලික වාදයක් නැත.. ශාසණය වෙනුවෙන් කතා කරමි.. එයට තරාතිරමක් නොබලමි..

සිවුර පිටින් එහෙම බෑ මෙහෙමයි කියනවනම් දෙවරක් නොසිතා සිවුර පසෙකින් තබා මේ ව්‍යසන හැකි මට්ටමින් ඉවත් කර නැවත පැවිදි වෙමි.. මා එතන ඉන්නා අයෙක් ය. අපට නැතිවීමට දෙයක් නැත.. නාමරූප විකෘති⁣යෙන් පැණවෙන ලෝකයක කුමන බලාපොරොත්තු ද ? මාර දෘෂ්ඨි නොවෙ ද ?

කලක් අර චාල්ස්ව අල්ලන් නැටුවේ ය. දැන් එයට කථා කරන කටවල් බොහෝ ය.. අපට සතුටු ය.. චාල්ස්ට ඇරෙන කටවල් මිථ්‍යාවටත් ඇරේවා..යි පතමි.

නැතිනම් මේක කෙළවරක් වෙනකම් නිහඬව සිටීම යහපති..

අවස්ථාවක් ඇත.. නම ගම ආයතන ගැන සිතා බලා ඉදිරිපත් නොවී සිටීම ගිහි පින්වතුන් විසින් ද සැක මතුකරලිය යුතු තැනකි..

අප ශාසණයේ කථා නොකරමි... හුදු ශාසණය වෙනුවෙන් කථා කරමි..

දැනුම මීයාගේ නැට්ටේ බැඳි පූසන් මෙන් නොවේවායි පතමි..

ඉදිරියට දිගින් දිගටමත් අප විසින් ලිවිය යුතු දෑ ලියන්නෙමු.. කිව යුතු දෑ කියන්නෙමු..

මෙය මාගේ තරුණ කමක් වත් ආවේගයක්වත් නොව.. ඉතින් එය එසේ නම් එය එසේ වෙත්වා.. එය මට යහපත් ය..

මේ වසුරු පිඬ මගේ අතේ ගෑවෙත්වා.. එවිට ඔබ වහන්සේලාට සුව සේ ගඳ නොගහ යන්න පුලුවන් වනු ඇත.. එයට අවස්ථාව මට දෙත්වා..

අවසරයි..

තෙරුවන් සරණයි ..

✍ Author: Ven. Kirulapana Dhammawijaya Thero